WILLEMSTAD – Awe mainta polisnan a bin topa nan ku un situashon basta pekuliar na momentu ku a bin enkontra un outo prosedente di ladronisia den Salsbachweg. Den e kaya aki tin un kas bandoná i tabata alrededor di 4or di mardugá ku bisiñanan a tende algun zonido straño. No kier a tuma ningun riesgo i ta awe mainta a sali bai wak i topa ku un vehíkulo skondí hinka den parti patras di e kas bandoná. E ladronnan a logra kita e bùmper dilanti pero tabata benta den e kura einan mes. Tur esaki ta duna indikashon ku nan lo kier a bin bek pa kaba di hasi e trabou di pluma e outo. Polis a yega na e sitio pero no por a saka e outo ya ku asina bon e tabata skonde tras di e kas den un hanchi smal. Ku tur probabilidat ta un vehíkulo ku un turista lo a hür serka un kompania ku a keda hòrta. Polis tin un keho risibí di un Chevrolet ku a keda hòrta na un playa popular. E vehíkulo aki tambe ta un Chevrolet. A pidi asistensia di mas polis pa wak kon por move e outo pa pone den un posishon ku kran por saka e outo aki ya ku no por start esaki. E forma ku e ladronnan a bai laga e vehíkulo ta imposibel pa saka esaki. Departamento di Joyriding ta na e sitio pa hasi investigashon meskos ku tur e otro kasonan di último tempu.