WILLEMSTAD.- Ponementu di “fever” a resultá malu pa shofùr di un Mustang, na momento ku tabata drai su outo sakando bastante huma den área di Rooseveltweg djasabra último i pa despues e dal tras di un vehíkulo ku tabata stashoná.

E video a bai viral, djis despues di e suseso.  Por a mira kon e shofùr tabata drai e vehíkulo un kantidat di bia riba kaminda públiko i mei mei di vários outo ku tabata pará den serkania.

Dado momento e shofùr kier a bai drai su outo na e otro parti di un edifisio, pero esaki a bai kompletamente robes, ora ku el a dal tras di e outo.

Mesora e shofùr ku ta un dama a bula baha despues ku su vehíkulo a risibí e choke.  Aparentemente shofùr di e Mustang a trata na yega na un areglo ku e víktima, pero e dama no kier a tende nada di esaki i a opta pa yama polis.

Segun e rumornan ku tabata sirkulá, e dama a sufri di e asina yama “Whiplash”, pero den un kombersashon ku Extra tabatin ku bosero di Kuerpo Polisial sr. Rosalina, el a splika nos ku te ainda e informashon ei no a yega serka nan.  Ambulans tampoko mester a presentá na e sitio. Loke sr. Rosalina a konfirmá pa Extra ta ku e vehíkulo kual e shofùr a usa pa dal rònchi a keda konfiská.