WILLEMSTAD.- Ayera atardi polisnan a keda dirigí pa Kaya Shers na Koraalspecht despues di a risibí informashon ku lo mester tin shofùr di dos vehíkulo persiguiendo otro. A manda un kantidat di polis den e área. Na yegada di polisnan no a topa ku ningun persekushon pero si a topa ku un vehíkulo di kèntel den un pida roi. Probablemente e vehíkulo aki tabata un di e dos vehíkulonan envolví den e persekushon.

Testigunan a indiká ku nan a mira un persona baha ku arma den man i kore bai for di e sitio despues di e aksidente.

Komo no tabatin ningun hende pa para responsabel pa e vehíkulo, polisnan a konfiská esaki pendiente mas investigashon.