No mester warda baka hoga na pos

WILLEMSTAD. - No mester warda baka hoga na pos, pa despues hasi algu, esaki ta loke ku abitantenan di e bario di Sapaté a duna di konosé na redakshon di EXTRA.

Algun abitante di Kayanan Hubert M. Schoop i tambe Claudimiro M. Lodewijks ta preokupá pa e velosidat haltu ku outomobilistanan ta pasa den e kayanan aki.

Ta trata di kayanan ku ta krusa den e bario di Sapaté ku ta un bario relativamente nobo, kaminda ku tin hopi famia hóben ku yu ta biba. Un bario kaminda ku tráfiko mester move slou pa motibu ku kaminda tin hopi mucha, semper un mucha por kore sali kurá di kas.

E dos kayanan menshoná no tin drèmpel pa baha e velosidat, pero ta kayanan stret ku ta duna e outomobilista e posibilidat di subi su velosidat te na un forma iresponsabel.

Por ehèmpel  Kaya Hubert M. Schoop, si e outomobilista ta bin for di pariba direkshon pabou, despues di un rotònde chikí ku tin na un krusada, e outonan ta kue un velosidat haltu i ya ora ku nan ta den e promé bògt, nan ta na un velosidat iresponsabel haltu. Esaki ta loke ku abitantenan ku ta biba den e kaya aki ta eksperensiá tur dia di nobo.

E peliger no ta solamente pa muchanan ku lo por subi kaya, sin paga tinu, pero tambe pa outonan ku ta sali na  kurá di kas, ta haña sorpresa tur dia di nobo ku ora ku nan sali nan kurá di kas, ya tin un outo riba nan, miéntras e kaya tabata ketu pa nan sali nan kurá di kas.

Esaki ta konta tambe pa Kaya Claudimiro M. Lodewijks. E kaya aki ta manera un pista di “drag” i e outomobilistanan ta komportá nan mes komo tal tambe.

P’esei abitantenan di e bario aki a ekspresá nan preokupashon pa ku e situashon i ta pidi outoridatnan konserní pa tuma medidanan pa baha e velosidat prinsipalmente riba e dos kayanan aki ku tur dia di nobo ta un peliger pa e abitantenan.

...Esaki ta Kaya Claudimiro M. Lodewijks. Ta manera un pista pa “drag”. Outonan ta pasa ku hopi velosidat riba e kaya aki...