Un biaha mas habitantenan ta pidi atenshon:

WILLEMSTAD.- Un di e kayanan aki na Kòrsou ku ta un peliger tur dia pa usuarionan ta Lyraweg, asina habitantenan di e kaya aki a duna di konosé na EXTRA. Ta trata di un kaya smal ku vários bògt peligroso a bira popular pa usuarionan den tráfiko, ku ta un alternativa pa evitá e tráfiko pisá ku tin den Saliña.

Ta trata di e kaya ku ta konektá Ser’i Loraweg ku Perseusweg. E kaya aki ya pa basta aña tin un preshon enorme di tráfiko ariba. Den oranan di mainta tempran tur dos banda di salida tin fila i atardi meskos.

E peliger mes ta despues di e entrada for di Ser’i Loraweg direkshon Perseusweg, kaminda ku tin un parti hopi smal, despues ta sigui ku vários bògt skèrpi, ku riba su mes no ta un problema si kore ku velosidat manera stipulá den reglanan di tráfiko pa ora ku ta kore den bario.

Pero e velosidat ku vehíkulonan ta pasa tur dia kuné den e kaya aki ta espantoso. E loke ku ta hasi e situashon mas peligroso ainda den e kaya aki, ta vehíkulonan pisá, trèkernan, dòmtrùk kargá ku greis ta pasa i ta bisto ku na algun okashon por tuma nota ku nan tin purá i no ta tene kuenta ku ta trata di un kaya smal ku tur e peligernan ku esaki ta trese kuné.

Riba un base regular outo ta aksidentá akinan, pa motibu ku tur hende ke pasa pareu i ku velosidat haltu. E velosidat haltu ta riba un base regular i ora e kaya ta ketu, ta mas peligroso ainda.

Antes tabatin e kusinchinan den e kaya aki, di manera ta baha e velosidat, pero pa un motibu òf otro a kita nan. Algu mester keda hasí pa baha e velosidat den e kaya ku tin hopi bògt i prinsipalmente na e parti mas smal di e kaya. Mester baha velosidat na e parti smal di e kaya aki i na entrada di Girouette.

Habitantenan ta pidi esnan konserní pa hasi algu promé ku algu grave tuma lugá.