WILLEMSTAD.- Korte di promé  instansia a trata kaso di e hóben Reyshen Maria (21).  Maria ta keda akusá di tabatin un arma kandela dia 27 òktober 2020, mas 11 bala i un tiki cheiba.

Segun e prosèsverbal riba e fecha en kuestion, durante toke de keda, pues despues di 11 or di anochi polis a mira un outo pasa riba velosidat, na momento ku nan a mira presensia di e patruya.

Esei a hala nan atenshon i a pone ku nan a para e outo pa kontròl. Na momento ku  e shofùr a baha glas di outo, e agentenan a sinti holó fuerte di mariwana i a disidí pa kontrolá riba arma i droga.  Martis tabata huntu ku un otro okupante.

Durante kontròl polis a haña un tas den e vehíkulo ku e arma aden. Ora polis a puntra di ken e arma ta, Martis a bisa di dje.

Hues a bisa ku esei no tabata promé bia. Riba esaki hues  a puntra Martis dikon e ta hasi e tipo  di kosnan ei.

Segun Martis  el a kaba di kumpra e arma serka un chòler. E tin kurá di kabritu i p’esei el a kumpra e arma. Segun Maria, polis no a pidi pèrmit pa kontrolá. Nan a par’é, pidi nan baha fo’i outo, kontrolá nan na paña despues kontrolá den outo.

Fiskal a haña e akusashon probá i a demandá Maria na 18 luna kondishonal. Hues den su desishon no a mira motibu pa desviá i a bai kompletamente di akuerdo ku fiskal.