WILLEMSTAD.- Ayera hues de Kort a posponé  kaso di e hòmber Harry Chirinos Perez (46), nase na Venezuela, akusá pa transportashon ilegal di 30 adulto i 1 menor di edat  for di Venezuela pa Kòrsou, dia 13 di desèmber aña pasa.

Segun e prosèsverbal di e tim di Warda Kosta, e akusado tabata e kapitan, pues ta esun responsabel pa e lancha ku nan tabata aden.

Despues ku nan a detené e akusado, el a bisa ku bèrdat e tabata e kapitan di e lancha pero despues a kambia su deklarashon.

El a bisa ku e no tabata e kapitan sino tripulante ku tambe a riska su bida riba laman pa e bin traha na Kòrsou pa kria su famia. Segun e akusado e kapitan mes a kita for di e stür i nèt ora el a bai para e stür pa yuda, warda Kosta a presentá i a kere ku e tabata e kapitan di e lancha.

Esaki a trese un buèlta nobo den e kaso, pa motibu di e kambio den e deklarashon. Ayera e akusado a presentá den sala i a bisa ke ta kansa di warda.

E tabatin un aktitut basta iritá i desesperá pa motibu ku e ta bai hasi 1 aña será i ainda sin su kaso por keda tratá.

Hues de Kort a splik’é ku su abogado mr Ayubi a hasi petishon, pa skucha algun testigu ku tabata den e lancha huntu kuné.

Pero e problema ta aun mas grandi, pa motibu ku tur esnan ku por para testigu a keda deportá pa Venezuela. Pues awor Ministerio Públiko mester bai wak si por drenta den kontakto ku nan pa deklará i esaki sigur lo bolbe bai tuma mas tempu.

Esaki a pone ku Chirinos Perez a bira furioso i a bisa pa akus’é komo kapitan numa, paso e no por mas.  Despues ku su abogado a bai papia kuné, e akusado a  trankilisá su mes i bai di akuerdo pa buska e testigunan na Venezuela pa skucha nan.

Hues a bis’e ku si no lokalisá e testigunan, e kaso lo keda trata numa integralmente.  Mirando tur esakinan, e kaso a keda posponé pa dia 27 yanüari 2021.