WILLEMSTAD.- Ku entrada di estranheronan komunidat mester paga masha bon tinu, pasobra meimei di tur e karnénan sa tin lobo ta kana wak unda nan por haña kualke víktima. T’asina ku un komersiante Chines por poko a pèrdè su negoshi despues ku el a hür esaki di buena fe ku un señora di nashonalidat Venezolano. Tras di su lomba e muhé Venezolano a kuminsá hasi trámitenan pa kita e negoshi fo’i dje, pero falta di sierto pèrmitnan a pone ku su plan diabóliko no a kristalisá.

T’asina ku outoridatnan a bai ayera na un restorant riba e krusada di Roosevelteweg i Blanquillaweg (Ling Hua). EXTRA a komprondé ku aki MEO a hasi su kontrol i a bin resultá ku e papelnan no tabata na òrdu. Primeramente no tabatin pèrmit di establesimentu, miéntras ku nòmber dje restorant tambe a kambia pa “Yaya Restaurant”.

Es mas, durante e kontrol aki a nota presensia di 13 dama Venezolano. Ora ku a bai kontrolá nan dokumentonan a bin resultá ku 5 di nan tabata ilegal. Pues nan a haña un espasio grátis pa despues nan ser deportá.

Segun informenan ku nos a risibí di sr. Ronnie Cornelis di MEO, e muhé Venezolano lo a bai hasi kambionan di e negoshi sin konsentimentu di e komersiante Chines ku ta doño. E tabata hür e lugá pero for di dia 16 di desèmber último el a kuminsá hasi e trámitenan. El a bai Kámara di Komersio, i asta a pidi BAB pa e haña un number Crib. Tur esakinan el a hasi sin e Chines sa.