WILLEMSTAD.- Ayera korte di promé instansia a trata otro kaso di venezolanonan ku ta trata di bin Kòrsou ku arma i munishon.
Pa esaki e akusado Rommel Martinez Delgado (27), mester a presentá den sala di korte pa responsabilisá su mes pa un kantidat di 2 “handgranat” ku el a bin kuné, 8 tipo di arma di kandela manera Glock, revòlver i tambe mashin outomátiko, 954 sorto di bala i 14 diferente lachi pa karga.
Segun hues van Edelenbos, dia 12 di desèmber último e operador di radar a tuma nota di 4 boto di forma sospechoso ku tabata move den área di Spaanse Water.
Mesora e personal a bati alarma i e tim di wardakosta a sali ku nan Super-RHIB den e área menshoná i a logra interseptá e botonan aki.
A topa 3 boto modèl “Speedboat” ku tabata tou 1 boto ku lo tabatin problema ku motor.
Durante kontròl nan a haña un saku di kual esaki tabatin tur loke a keda menshoná ariba, riba un di e botonan.
Mesora e akusado a atmití su kulpa i a bisa ku e ta e kapitan di e boto i ta para responsabel. Riba e boto tabatin 7 persona mas, pero e akusado a bisa ku ta trahadónan i no tin nada di aber ku e loke nan a keda hañá.
El a splika ku e mester a trese 3 boto Kòrsou pa bende.
Segun e akusado, e ta kumpra i bende boto i a haña un oferta di 1000 dòler serka un tal Adrian pa trese e merkansia nan Kòrsou.
Aki un hòmber ku yama Iziquiel lo mester a para ward’é den área di Caracasbaai, pa tuma e saku serka dje.
Hues a relatá ku na polis e akusado a duna 3 diferente deklarashon.
Segun hues e akusado a bisa promé ku e tabata sa di e saku, e di dos biaha el a bisa ku ta un kaha el a haña pero no tabata sa kiko tin aden.
El a bisa tambe ku el a sospecha ku tabatin algu ilegal den e kaha.
Hues na su turno, a bisa e akusado ku su deklarashonnan ta inkonfiabel.
E akusado a duna di konos’é ku el a deklará eseinan promé pa motibu ku ta promé bia el a hañ’é den man di hustisia.
El a bisa ku e ke pidi komunidat di Kòrsou pordon pa loke el a hasi, pa motibu ku el a laga su nesesidat dominá su trabou. Segun akusado el a biba 3 aña aki sin nunka a hañ’é den problema.
Segun akusado su kasa a wòrdu menasá na Venezuela i tambe agredí pa e kaso aki.
Fiskal ta haña e akusashon probá i ta demandá e akusado na 36 luna kitando aresto preventivo.
Hues den su desishon a bisa ku e akusado mes a skohe pa trese e kosnan ilegal i kontra lei Kòrsou.
Hues a splika e akusado ku arma ta un problema grandi na Kòrsou i ku no ta tolerá esaki.
Mirando tur esakinan, hues a bisa di ta bai di akuerdo ku e demanda di fiskal.