WILLEMSTAD.- E venezolanonan ku resientemente a keda detené den lanchanan yegando Kòrsou ta grita pa yudansa. EXTRA a papia ku vários di nan i nan ta pidi yudansa pa nan por haña kuminda i ounke ta slòf na nan pia.

Segun nan a bisa EXTRA, ta trata aki di 45 ku tabatei kaba i djaweps último a bin 26 aserka.

Tur ta venezolanonan ku a riska nan bida riba laman pa yega Kòrsou pa por buska un mihó bibá. Sinembargo wardakosta ku ta atendé riba nos isla i den laman a pone man riba nan i awor nan ta será den Barak di SDKK sperando pa keda deportá bèk pa nan pais.

Esnan ku EXTRA tabatin kontakto kuné a bisa ku e desesperashon ta grandi. “Nos a drumi abou, a duna nos papa i ayera atardi pan ku pida belèg den dje kome. Nos ke maske ta un slòf pa pone na nos pia”, asina e venezolanonan a pidi EXTRA pa publiká pa nan.

Nan ta spera ku tin organisashonnan na Kòrsou ku por sali na nan yudansa i aliviá nan situashon te ora nan por bai bèk nan pais, for di unda nan a hui pa bin aki.