CARACAS.- E vise presidente venezolano Delcy Rodriquez den un deklarashon públiko a eksigí prueba di bida di presidente Nicolas Maduro. E vise presidente venezolano ta papia di un atake brutal ku ta kontra di tur norma di derecho internashonal i violando e karta di Nashonnan Uni. A violá tambe kon mester atendé diferensia di opinion entre estadonan Soberano.

Pueblo venezolano ta indigná, paso a ataka e kapital di Venezuela den e atake brutal aki. Gobièrnu di Venezuela pa medio di su vise presidente ta eksigí gobièrnu di Donald Trump pa duna prueba di bida di forma inmediato di presidente Maduro i su kasá.

Delcy Rodriquez a bisa ku ya kaba presidente Maduro a pone su pueblo den alerta pa posibel aktonan di agreshon i a instruí pueblo di Venezuela pa subi kaya. Venezuela ta kondena e atakenan ku a kousa morto di militarnan i sivilnan rònt e pais.