WILLEMSTAD.- Awe djaweps ta pinta di bira un dia basta interesante den korte. Un di e kasonan ku sigur lo tin hopi interes ta e kaso di apelashon di The Alley. E kaso den kua a tira dos hóben mata den e diskoteka den Punda. E sospechosonan den e kaso aki ta R.C. de J., C.S.M. i R.A.S.C. E kaso ei ta programa pa keda trata awe mainta kuminsando 9:30.

Despues di mèrdia tin vários veredikto ku mester kai den korte. Entre otro mester tin e veredikto den e apelashon di e kaso konosí komo ‘Bandera Grill’. E sospechosonan den e kaso aki ta G.G.P., E.L.W. i E.E.W. Otro veredikto pendiente pa kai awe ta esun den e kaso konosí komo ‘Followers’. Den e kaso aki e sospechoso prinsipal ta Orlando Balentien konosí tambe komo apòstel. E emoshonnan rondó di e kaso aki ta haltu, pues lo tin hopi atenshon di Públiko pa e kaso aki.

E di tres veredikto pendiente pa awe mainta ta esun den e kaso konosí komo ‘Valencia’ ku ta trata e akusashonnan kontra funshonarionan di servisio di atmishon i ekspulshon (red. imigrashon). Awe mèrdia e señora I.T den e kaso aki lo tende sentensia di wes.