WILLEMSTAD.- Funshonarionan di MEO i tambe BAB a presentá na Qin Lin Bar na Rooseveltweg pa un kòntròl.
Na nan yegada manera ta kustumber a kontrolá entre otro pèrmit(nan) di e establesimentu, identifikashon di empleado, kaha pa kobra kliente (BAB) i tambe higiena di e establesimentu.
Na nan yegada mesora e funshonarionan a konstatá ku e establesimentu no tin ningun pèrmit pa por operá di un forma legal.
Esaki a pone ku lógikamente e establesimentu aki tabata bende bebida alkohóliko di un forma ilegal.
Kushina di e restorant/bar aki tabata hopi sushi ku kumindanan para i sushi di bestia tur kaminda.
Tambe e funshonarionan a konstatá un kantidat di buki di number ku ta wòrdu bende na klientenan di un forma ilegal. Esakinan tabata bon skondí den wasmashin.
Durante di e kòntròl tambe a konstatá un kantidat di viagra chines ku lógikamente tambe ta wòrdu bende di un forma ilegal.
Na e establesimentu aki no tabatin un kaha seya di BAB pa kobra kliente.
E kaha ku tabatin presente no ta pertenesé na e sitio kaminda e kòntròl a tuma lugá. Esaki a keda deskubrí despues ku a saka un bon for di e kaha.
Tambe a konstatá algun klapchi skonde den kushina di e establesimentu.
Mesora a sera a establesimentu i a indiká na propietarionan ku esaki lo permanesé sera i lo por habri na momentu ku limpia i pone tur dokumentu na òrdu.