WILLEMSTAD.- ViBa (Fundashon Vishon Banda Bou) a disidí di entregá denunsia ayera riba posibel malversashon ku fondonan ku tabata destiná pa e proyekto di Sportveld Barber.
Ministerio públiko a konfirmá ku ayera mèrdia, 16 di mart 2018, Fundashon ViBa a entregá denunsia na Landsrecherche Curaçao (LrC) di posibel iregularidat ku a tuma lugá den otorgamentu di supsidio na e fundashon deportivo, ku a keda enkargá pa traha e sentro deportivo na Barber.
LrC a palabrá ku ta invitá un representante di e fundashon mas despues pa supstansiá e denunsia. Despues Prokurador-general (PG) lo risibí e dokumentashon di LrC pa tuma un asina yamá "vervolgbesluit".
Tambe PG mester determiná mas despues ta kua instansia eksaktamente tin ku hasi e investigashon komo ku LrC ta envolví solamente na momentu ku un persona, kontra kua ta hasi denunsia, ta un ámtenar. I esei posiblemente no ta e kaso.
Mester remarká ku dia 14 di mart último minister enkargá ku asuntunan di deporte sra. Marilyn Alcalá-Wallé, mes a bai SOAB, kaminda el a duna enkargo pa hasi un asina yamá “feitenonderzoek” riba e proyekto di Sportveld Barber. E titular di deporte a akudí na SOAB, pasobra el a hasi diferente intento pa por haña un bista kompleto en kuanto e trayekto di Sportveld Barber, sin por a keda kla.
E fundashon di Banda Bou for di 2016 a papia riba e asuntu aki, i aña pasá a bai mas profundo ku a duna 985 mil florin pa drecha e vèlt, pero nada a sosodé.
Segun ViBa e ora ei e fundashon Sentro Sosial i Deportivo Barber a pone algun blòki, kurá i tambe mast. Pero nan no ta kere ku esakinan por a kosta 985 mil florin. ViBa ta akusá eks polítiko David Dick ku a na kabes di e fundashon di deporte na Barber i kual fundashon a haña plaka pa drecha e vèlt, komo esun ku mester sa mas di e plaka ku lo a disparsé sin e proyekto terminá kompletamente. P’esei e denunsia di ViBa ta dirigí kontra di e presidente di Sentro Sosial i deportivo Barber tambe, esta sr. Dick.
Pues dos investigashon ta na kaminda pa trese klaridat den e kaso aki.