WILLEMSTAD.- Ayera a bai rònt un video di un akto seksual den un establesimentu ku muebel blou. Tur kos ta mustra ku e hòmber a graba e akto probablemente sin ku e muhé lo sa. E video a bai rònt hasiendo komo si fuera ta den ofisina di ACU e akto seksual a tuma lugá. Gerensia di ACU ta rechasá esaki.

Nan ta informá di a tuma nota di e video ku ta bai rònt kaminda aktonan privá i personal di un pareha ta tuma lugá den un espasio di ofisina. ACU ta distansiá su mes di e akto aki i tambe e video.

Lamentablemente sin niun base un narador ta bisa ku e aktonan aki lo ta tumando lugá na un di e ofisinanan di ACU.

Lokalidat di e video aki NO ta na ningun ofisina di ACU. Gerensia ta kondená e kalumnia aki. ACU ta hasi denunsia di difamashon kreá pa e ‘fake news’ aki.

Apesar di esei ACU ta keda ku tur atenshon riba nan trayektonan di kambio ku  ta den aktualmente ku tin komo meta garantisá kresementu, kalidat i un futuro stabil di nos ACU ku e meta pa sigui sirbi tur nos sosionan i komunidat pa hopi aña mas.

E motibu ku ACU ta duna un reakshon públiko ta pa  sosionan  i no-sosio ku ta respetá nan, loke ACU ta apresiá i gradisí pe.