WILLEMSTAD.- Un bia mas Kuerpo Polisial a tuma nota di dos video kontra moral ku a keda publiká riba retnan sosial. Ta trata aki di dos video kaminda dos damita, menor di edat ta keda eksponé hasiendo aktonan inmoral i te asta teniendo relashon seksual ku un òf mas hòmber.

Aparte ku polis ta sensura e aktonan aki den su totalidat, no ta muchu kla tampoko ku e damanan aki ta hasiendo e aktonan aki kontra nan boluntat òf no. E kasonan aki ta den pleno investigashon i Kuerpo Polisial ta hasi un yamada na komunidat pa no sigui kompartí e videonan aki.

Esaki ta kontra lei i di otro banda e menornan aki mester keda protehá, ya ku e publikashonnan iresponsabel aki por tin konsekuensia pa nan futuro. Si tin siudadano ku tin informashon di e kasonan aki, sea asina bon di drenta den kontakto ku polis inmediatamente.