WILLEMSTAD - Kuerpo Polisial a bin ta tuma nota ku potrètnan i videonan di aktonan inmoral ku menornan di edat riba medionan sosial ta bolbe birando un tendensia den nos komunidat.

Den pasado ya polis a bin ta alertá pa e tipo di aktonan aki i te asta tabatin diferente kaso kaminda sospechosonan a keda persiguí pa hustisia i kondená na kastigu di prisòn.

Últimamente e aktonan aki un bia mas ta lantando kabes, sin ku ta tene debido kuenta ku aparte ku e komportashon aki ta kontra di lei, pues kastigabel, no ta para ketu na e derechi ku e menor di edat/ e mucha tin.

Ta bon pa bolbe enfatisá ku no solamente esun ku ta kometé e akto inmoral ku e menor i esun ku ta graba, saka potrèt so ta kastigabel, pero tur hende ku ta plama e imágennan aki òf simplemente tin nan den nan poder, tambe ta violando e lei kontra moral ku ta ankrá den nos kódigo penal.

Un yamada ta bai na tur persona ku ta disponé di e imágennan pornográfiko aki pa no sigui distribuí nan i te asta e rekomendashon pa saka nan mesora for di bo aparato ku ta karga informashon digital manera lèptòp, telefòn ets.

Un apelashon na tur esnan ku ta kometé aktonan inmoral ku hóbennan menor di edat òf muchanan chikí, pa stòp inmediatamente, ya ku hustisia ta persiguí e akto penal aki ku tur forsa. Realisá ku asta ora e menor di edat bai di akuerdo, bo ta keda kastigabel, pasobra komo mayor di edat, lei i komunidat ku ta protehá e menor, ta spera ku bo sa mihó i por husga mihó ku e menor.

Kuerpo Polisial ke hasi un yamada na tur persona ku por identifiká e víktimanan den e kasonan di aktonan inmoral ku menor, pa mèldu i denunsiá esaki mesora na sea polis, Ministerio Públiko, Fundashon Ayudo pa Víktimanan òf kualke instansia ku por yuda den e kaso aki pa nos por inisiá un investigashon pa persiguí esnan kulpabel den e kasonan aki. “Nos tur komo siudadanonan den e pais aki tin e deber síviko di protehá nos muchanan i tene nan leu for di gara di esnan ku ke probechá di nan inosensia òf abusá di nan pa finnan ageno. Laga nos sensurá e aktonan aki dor di no sigui plama e potrètnan i videonan ku por tin konsekuensianan devastador pa e menor i su futuro, ku ta nos tur su responsabilidat di kuida.”

Kuerpo Polisial ta gradisí tur siudadano di antemano pa nan koperashon, denunsiando lokenan ku ta robes i rechasá e imágenan aki.