WILLEMSTAD.- Ayera   kaso di e asesinato ku a sosedé na Gosieweg dia 26 di novèmber 2017 na Chito Bar,  a keda tratá den su kontenido, despues di a keda posponé na vários okashon.

Pa ku esaki e akusado Xiouelle “Wenchi” Tweeboom ta keda akusá ku dia 26 di novèmber 2017 pafó di Chito bar na Gosieweg, el a asesiná e hòmber Darwin Ernesto Herro Acosta, nasé na Santo Domingo 27 òktober 1991,  despues di a risibí bala for di un arma kandela.

Tweeboom semper a  insistí ku e sigur no tin nada di aber ku e kaso aki, pa motibu ku e ta bon amigu di e víktima.

Ayera durante tratamentu di e kaso, el a hasi uso di su derechi keda ketu.

Hues a duna di konos’é ku na polis e akusado a deklará ku tabatin un grupo di hòmber ku tabatin problema ku  víktima for di den baño.

E akusado a sigui bisa ku despues nan a sali for di den baño, di kual e hòmbernan a bin nan tras i tira su amigu mata.   El a bisa ku e no sa e motibu dikon nan a tira su amigu.

Segun e akusado na polis tantu e komo e víktima tabatin arma di kandela.

Fiskal a duna di konos’é ku durante di e tiroteo, 11 bala a keda di los den direkshon di e víktima.

Mama di e víktima  deklará na polis ku tabatin algun rumor ta sirkulá ku e amigu lo mester tabatin relashon amoroso ku señora di e víktima.

Tambe hues a bisa ku e mama a deklará di a tende ku pa añanan e akusado ku tabata amigu di e víktima, a plania su morto.

Tabatin testigunan ku a mira e akusado ku e arma den e sitio.

Fiskal Koert a duna di konosé ku un testigu ku tabata na e  sitio a deklará ku tabatin un problema den baño.

Ora ku el a bai el a mira e akusado den diskushon ku su amigu te ku nan kier a bringa ku otro di kual e na su turno a pusha e víktima i kita nan fo’i otro

Segun e deklarashon di e bewaker, tabatin un problema den baño di kual el dirigí su mes pa einan.

El a bisa ku e akusado a dirigí arma riba dje, na momento ku el a drenta den baño. Segun e bewaker  ta trata di un arma Baretta ku 16 bala di kual el a purba kita e arma for di e akusado pero no a logra.

E DJ ku tambe a yega serka a puntra kiko ta pasando i a  dal e akusado un klap na su pechu. Mas aleu e bewaker a duna di konos’é ku e akusado a keda ku e arma dirigí riba nan i a bisa ku e lo tira nan.

Segun e deklarashon di e bewaker mas aleu, e víktima na e momento ei a puntra nan kiko a pasa.

Ora ku nan e respond’é ku e no ta mira ku su amigu tin arma, esun ku a resultá víktima a bisa ku e arma ta di dje.

E  bewaker a sigui deklará mas aleu ku na momento ku e akusado a bai pafó, un grupo di hòmber a bai riba dje.

Despues e víktima mes  a sali pafó i a bin serka e bewaker pidié sòri pa loke a kaba di pasa.

El a bisa ku  e lo bai papia ku su amigu ku ta Tweeboom riba e loke a sosedé den tualèt.

E bewaker a sigui deklará ku el a mira e víktima kana bai serka e akusado i dado momento el a tende stèmnan bai haltu, pa despues e tende un zonido di bala.

El a  bisa di a mira kon e akusado a kore bai tras di un vehíkulo, pa despues e bolbe skucha mas zonido di bala. Segun fiskal, e bewaker a deklará di no por a mira ta ken a tira pa motibu ku nan a drenta paden i dal e porta di e bar sera.

Despues di 2 pa 3 minüt ku nan a habri e porta, nan a tuma nota  di e akusado drumi riba e víktima bisando ku nan a kita e arma fo’i dje i tira su amigu mata pero no a mira e arma nunka mas.

Den e deklarashon mas aleu, e bewaker a splika ku e por a mira kon e akusado a wòrdu fuertemente pusha patras, pero e no por a mira ken a push’é.

Ora el a mir’é keda para el a tende e promé tiru, despues di algun sekònde e otro tirunan a kai, pero no por a mira tampoko ken a tira.

Fiskal Koert a relatá vários deklarashon di algun testigu. Algun amigu di e víktima lo mester a bisa ku nan ta rabia ku “Wenchi” pa motibu ku el a laga e víktima sali sin su arma. Durante i despues di e suseso tur amigu a bandoná e  sitio.

Segun fiskal, e víktima i su amigunan a pone sèn huntu pa kumpra arma di kandela di kual esaki tabata wòrdu fiá  na tur esnan den e grupo di amigu ku tabatin mester di dje.

E arma lo a keda usa pa  likidá e víktima mes.