Miéntras ku outoridatnan ta na e sitio unda a hana e kurpa sin bida, kontinuando ku e investigashon, EXTRA ta komprondé ku lo tin indikashon hopi serio ku lo a dal e víktima ku a haña morto, ku outo tambe. Te na e momentunan aki tin indikashon hopi serio den e direkshon ei. Tantu CRS komo departamento di tráfiko di Kuerpo Polisial ta na e sitio hasiendo investigashon.

Víktima di asesinato ta mustra señal tortura

WILLEMSTAD – Awe mainta outoridatnan polisial a bai na un sitio tras di stadion di Suffisant unda lo mester tin kurpa di un hende hòmber ku lo no ta duna señal di bida. Mesora por a nota ku e víktima a keda tortura i entre otro tabatin un pia kibra. Tambe a los tiru riba e víktima i polis a nota e herida di bala. Dòkter di polis mester a akudí na e sitio pa konstatá morto di e víktima ku segun polis ta un persona relativamente hóben. Ta investigando tambe si ta posibel ku a dal e persona ku outo promé pa despues kaba di regla kuenta kuné. Polis ta pidi yudansa di komunidat pa si tin kualke informashon pa suministrá esaki na esnan konserní. Polis lo investigá tur senario ku presentá durante e investigashon. Asina tin mas informashon ofisial di parti polis lo kompartí esaki ku lektornan di EXTRA.