Fiskal a pidi 54 luna i detenshon inmediato di komersiante

WILLEMSTAD.- E komersiante hulandes T.B.(44) a keda demandá ayera na un kastigu di 54 luna mas detenshon inmediato, pa inmoralidat ku un menor fo’i tempu ku e tabatin 14 aña te ku 17 aña.

Ministerio Públiko ta akusá T.B. ku den periodo di 18 di sèptèmber 2015 te ku  1e di novèmber 2016, di tabatin relashon íntimo den tur sentido di palabra ku e hobensita.

E akusado su detenshon a keda suspendé pendiente pa su kaso keda tratá.

Ayera un bia mas tantu e víktima komo su mayornan i famia tabata den sala.

Hues a relatá ku e damita a deklará ku fo’i su 14 aña e tabata alumno di e akusado ku tabata mihó amigu di su tata.

Tambe e tabata traha den e negoshi di  resiklahe  di e akusado. Segun e damita fo’i 8 aña e tabata konosé e akusado dor di amigu di su tata di kas.

Un dia na un kamper e akusado a kuminsá hasi sierto weganan ku e no tabata haña masha leuk.

Na mart 2015 na momento ku su mayornan tabata den divorsio, tabatin hopi problema na kas.

Un dia e akusado a bai busk’é na skol i na kaminda e tabata kont’é su pasado i a bis’é ku su mayornan tambe a divorsiá.

E damita na su turno tambe a kuminsá konta e akusadonan e loke nan e tabata pasando aden na kas i tabata haña konsuelo serka e akusado.

El a bisa ku e akusado tabata konsol’é i a bis’é ku e ta un mucha muhé masha bunita i ku nèchi koló.

Segun e damita e palabranan ei tabata kai hopi bon serka dje, mirando e problemanan ku e tabata pasa aden ku su mayornan.

E víktima a bisa ku e akusado tabata e úniko ku tabata bis’é e palabranan bunita den e dia nan ei.

Na ougùstùs 2015 nan a bai Zanzibar  di kual nan a sunchi pa promé bes. Despues di esei e akusado a kuminsá hasi aktonan di inmoralidat kuné. I na desèmber di e aña ei, penetrashon pa promé bia a tuma lugá.

E akusado a bisa ku nan dos tabata hopi ‘verliefd’ riba otro.

E tabata konsol’é i tabata protehé. Nan relashon tabata den sekreto mirando ku e ta e yu di su mihó amigu i ku e akusado tabata kasá i tin un yu.

El a bisa ku no por papia di violashon seksual, pasó nan tur dos tabata di akuerdo ku e relashon.

Segun e akusado  e no tabata sa ku aki na Kòrsou lei ta prohibí aktonan seksual ku un damita di 14 aña. El a bisa el a wòrdu lantá na Venezuela i einan si tabata por. Na Colombia ku 15 aña i awor el a sa ku na Kòrsou 16  aña.

Riba petishon di Ministerio a skucha e damita ayera komo testigu.  E akusado a bisa hues ku e ta preferá no hasié, pa protehá e damita.  Pero e damita mes a bisa ku e ke pa e wòrdu skuchá bou di huramentashon.

Ku awa na wowo el a bisa ku tabatin vários momento ku e tabata yora durante di aktonan seksual, ku e akusado tabata kometé kuné.

Pero e akusado tabata bis’é ku ta normal ku un hende muhé ta yora e promé bes ku nan tene relashon.

Pero e damita a bisa ku tur ora e tabata yora pa motibu ku tabatin kosnan ku e no kier a hasi, pero tabata hasi nan tòg.

El a bisa ku e akusado a hasi tur kos kuné den tur sentido di palabra seksualmente. P’esei aworakí ora e pensa e kosnan ei, e ta haña gana di bebe kloròks pa limpia  paden di su kurpa pa motibu ku aworakí ora e pensa kiko e akusado tabata hasi kuné, e ta haña hopi asko i fis di su mes.

For di su 14 te ku 17 aña e tabatin un relashon ku e akusado sin su mama nan tabata sa.  Na momento ku su mayornan a haña sa , nan a sak’é for di e relashon inmediatamente. Segun e víktima awor ku e ta bou di tratamentu sikológiko, e ta realisá den kiko e tabata.

El a splika ku e no sa kon e tin ku yama e relashon entre e ku e akusado.

Sea tabata violashon òf abuzo. E akusado tabata hopi mas grandi kuné i tabata hasi tur kos kuné ku dos adulto ta hasi den intimidat.

El a bisa ku e ta baña mas di 8 bia pa dia tin dia, pa kita e fis ku e ta sinti, pero e sintimentu ei no ke kita. Mirando esakinan e víktima tabata yora sin konsuelo.

Relashoná ku esaki e komersiante  a bisa ku nunka no tabata su intenshon pa hasi daño na e damita. E tabata stim’é i a laga su kasá i su yu pa ta kuné.

E ta sintié malu pasó ta yu di su mihó amigu. Pero nan a gusta otro i tabata super felis ku otro te dia ku e damita a konta su mama ku a bringa pa kita nan for di otro

E komersiante a bisa ku for di dia di e kaso a bin den publisidat, el a pèrdè kliente. E ta wòrdu mirá komo un mònster den komunidat. El a bisa ku e no ta un hende ku ta gusta mucha, pero e loke e tabata sinti pa e damita tabata algu bunita i di bèrdat.

P’esei e ke pidi komunidat, koleganan, alumnonan, trahadónan su famia i famianan di e damita despensa pa loke el a hasi.

E ta atmití ku el a kometé un estupides, pero pasó e tabata ‘verliefd’.

Fiskal Martis a pasa den akusashon den un rekisitorio basta amplio i na final a duna di konosé ku e ta haña e akusashon kompletamente proba. El a bisa ku segun rapòrt sikológiko, e akusado ta hopi sosial  asta poko ‘sluw’ i e  chèns pa e bolbe kometé algu asin’ei ta hopi haltu.

Mirando tur esakinan fiskal a hasi demanda di 54 luna  di kual 12 kondishonal. Fiskal a pidi pa hasi detenshon mes ora di e akusado.