WILLEMSTAD.- Geraldino Martiena (53) ta keda akusá di a asesiná  Alwin Bremer di 61 aña na Baya Beach dia 29 di yanüari último.

E kaso a kontinuá ayera despues di a keda posponé anteriormente pa skucha testigu.

E  akusado  kier a laga skucha un amiga ku por konfirmá ku el a dun’é un left den e orario ku e suseso a tuma lugá.

Martiena ta keda akusá di a propiná Bremer 32 hinká  rònt su kurpa di kual esaki a kondusí na su morto. E parti íntimo di e víktima tabata kasi kitá afó. E tabatin vários hinká na su brasanan entre otro.

Ayera e testigu a bisa ku el a konosé e akusado na 2017 na Koredor. E ku su kasá ta kana tur dia ei nan di kual nan a bin sera amistat ku e akusado.  El a sigui bisa ku  un dia e akusado a bèl e fo’i prizòn i a bis’é ku e mester pa e yud’é, pasó  e no tin niun hende pa hasi esaki pe. El a bishitá Martiena 3 pa 4 bia kaba den prizòn. Nunka Martiena a papia di e kaso kuné.

El a splika ku riba e dia en kuestion e mester a hiba su subrino un kaminda i na kaminda el a topa Martiena tabata kana den área di Kraam Kliniek.  Ora hues a puntr’é kon e por sa ku e dia ei tabata spesífikamente riba un djamars, e señora a bisa ku un dia promé su subrino a bis’é ku mañan djamars e tin ku hib’é tal kaminda.

Hues a duna di konosé mas aleu, ku riba e dia en kuestion testigunan a mira un Kia Rio Shinishi kore drenta Baya Beach. Dado momento nan a skucha bochincha, pleitamentu i tambe zonidonan duru, pa despues mira e outo kore sali ku velosidat haltu.

Un di e testigunan a tuma nota di e number di outo i tambe ku bùmper di e vehíkulo ku tabata kibrá.

Polisnan durante investigashon a mira den imágennan di kámara ku e dia ei e víktima a bai sinta na un chines.

Despues di algun ora e Kia shinishi a lora wak e di kual el a drenta e vehíkulo i sigui bai.  Algun minüt despues por a  mira e Kia na altura di rotònde di Caracasbaai lora bai direkshon di Baya Beach.

Despues por a mira e vehíkulo atrobe lora e rotònde i kore bai.  Un testigu ku a nota e number di outo a duna di konosé ku fásilmente por a yega na e doño di e vehíkulo.

A resultá ku e outo tabata di hür pa Martiena. Polis ku a bai hasi investigashon  a bin deskubrí e vehíkulo dia 31 di yanüari na Airport hotèl  kaminda nan a detené e akusado ku tabata hospedá na e hotèl.

E akusado a ‘check in’ na e hotèl dia 29 anochi.

Ayera el a keda para riba ku e no tin nada di aber ku morto di Bremer.

El a bisa ku e dia ei Bremer a bah’é na kas i bai ku e outo. El a baña sali kas bèk, pa kue un bùs pa e bai landa na Bándabou. E ta inosente den e kaso aki i no sa nada di asesinato.