Sufri den aksidente di tráfiko:

WILLEMSTAD. - Korte  no ta uni su mes ku demanda di un señora ku ta claim ku Ennia a pag’e ménos di loke ku e tin di haña despues di a sufri un “whiplash” durante un aksidente di tráfiko. E señora ta claim ku e mester haña 10 mil florin mas di e 36 mil florin ku ya el a kobra.

Ta trata di un proseso ku a kuminsá kana for di 10 di yüni 2019 i ku resientemente korte a yega na un veredikto den e kaso aki.

T’asina ku e señora tabata enbolbí den un aksidente di tráfiko dia 19 di yanüari 2017. Manera ya menshoná e señora a sufri un “whiplash” i mester a haña atenshon médiko.

E kompania di seguro Ennia ta asegurado di e shofùr ku tabatin falta i mester a paga e señora un pago adelantá di Nafl. 19.866,64.

Durante e proseso i interkambionan ku tabata tumando lugá entre di  kompania di seguro i e señora, semper e señora tabata kompañá ku su kasá. E dos nan aki ta kasá, pero no ta biba huntu.

Na yanüari 2019 e señora tabata den eksterior pa tratamentu médiko. Durante di su ousensia, esta dia 31 di yanüari, e kasá ta presentá na Ennia na nòmber di su esposa, pa yega na un areglo di finalisashon kontra di un pago di 16.500 florin.

Ennia a bai di akuerdo i partidonan a firma i dia promé di febrüari 2019, Ennia a entrega e kasá un chek di 16.500 florin. Pues pa Ennia e kaso ta será, despues di a paga un suma di 36 mil florin.

Pa nan sorpresa dia 10 di yüni 2019, Ennia ta risibí un karta di e señora ku ta pidi pa nulofiká e akuerdo di finalisashon di e tratamentu.

Un dia despues di a entregá  e karta na Ennia,  e señora ta entregá un petishon pa un huisio sumario. E señora a demandá Ennia pa un suma adishonal di 10.800 florin òf un pago di 900 florin tur luna, kada bes oumentá ku interes legal.

Dia 9 di òktober 2019, Korte Sivil den Huisio Sumario ta rechasá e demanda di e señora. Korte ta di opinion ku e señora no a motivá su demanda muchu kla.

Despues e señora ta entamá un otro kaso kontra di Ennia, e biaha aki un proseso di fondo, kaminda ku aki hues ta profundisá mas tantu den e kaso.

E señora ta trese dilanti den korte, durante e proseso di fondo ku e akuerdo di finalisashon no tin balides pa motibu ku su kasá no tabatin outorisashon pa finalisá e proseso di tratamentu médiko. Na opinion di e señora, Ennia a hasi mal uso di e sirkunstansia, pa motibu ku e tabata den eksterior pa tratamentu médiko.

E señora ta claim ku e daño i perhuisio lo sali muchu mas tantu ku 36.000 florin ku ya nan a haña. E señora ta bisa ku e no tin trabou mas, e tin hopi doló ainda i ta sufri di kebrante di salú pa motibu di e situashon tenso ku e ta aden.

Ennia ta rechasá e akusashon ku nan lo a hasi mal uso di e situashon. Mas aleu, Ennia ta remarká ku no ta nan a pidi pa sera e kaso, e petishon a bin di parti di e kasá.

Ennia a trese dilanti ku nan a aktua semper di bon boluntat, sigur pa e echo ku tur bishita na Ennia e kasá tabata presente, pues no tin motibu di pensa ku e kasá no ta outorisá pa tuma sèn i òf yega na un akuerdo di finalisashon.

Korte a motivá ku e kasá a pidi pa sera e kaso pa motibu ku nan ta den un situashon finansiero kompliká.

Korte ta pone tur e puntonan ku e señora a trese dilanti un banda i a bisa ku niun kaminda tabatin mal uso di e situashon i a rechasá e señora su demanda i a imponé tur e gastunan di proseso pa su kuenta.