WILLEMSTAD.- Farahna van Donselaar-Metry ku ta e lider di ‘Unit Delitonan Moral’ a splika ku e protokòl ku ministerio di Hustisia a firma dos aña pasá ku KPC i OM ta enserá entre otro palabrashonnan di trabou sentral kordiná pa atendé ku delito seksual. Tambe un instrukshon pa partidonan konserní kon pa atendé i kon pa investigá delitonan kontra moral. I komo terser punto un ‘richtlijn stravordering zeden’. “Esaki lo enserá e ora ei ki tipo di kastigu ta pidi i ki ora ta pidi e tipo di kastigu ei dor di Ministerio Públiko, dor di prokurador-general.”
Van Donselaar-Metry, ku ta hurista di Ministerio di Hustisia, huntu ku minister Quincy Girigorie di Hustisia a duna un konferensia di prensa. El a splika ku e ‘richtlijn’ ta kla for di novèmber 2018. “I a sigui ku e ehekushon di e ‘hardware’, ku ta e Unit Delitonan Moral (Zeden Unit) pa sòru pa por kumpli ku e palabrashonnan ku ta sali for di e protokòl.”
Van Donselaar-Metry a splika ku for di protokòl a sali e palabrashon pa muda e ‘Zeden Unit’, ku tin e nòmber ofisial di JZZ, na un otro lokashon, ku ta un lokashon nobo.
E lokashon ta brinda mas privasidat na e víktima di abusu seksual. Tantu menor di edat komo mayor di edat. “Lokual ku nos a hasi ta muda e unit. Pero ekipá tambe e personal, e reshèrshi ku ta traha kaso di delito seksual, ku e konosementu nesesario pa alsa e kalidat di e aserkamentu i atendementu di e víktima di abusu seksual i ku su derechi tambe. Manera ta yama na hulandes ‘slachtofferbejegening’.”
Durante konferensia di prensa a mustra imágen di e unit nobo, ku segun Van Donselaar-Metry ta mas privá. Niun otro hende por wak e víktima. Tambe tin un kamber di dòkter. Antes e víktima mester a bai ku un reshèrshi na e ofisina di dòkter di kas. Awor no mas. E víktima ta duna su denunsia den e unit, e ta wòrdu eksaminá dor di un dòkter den e unit. I tambe tin un kamber pa interogashon i un kamber pa registrá e interogashon. E kámaranan ku ta registrá ta ‘up to date’ i por registrá tur movementu i ekspreshon di kara di un mucha òf un otro persona ku ta hasi denunsia. Segun Van Donselaar-Metry ku esaki a halsa e kalidat pa trata e víktima.
Dia 9 di òktober diferente miembro di Aliansa a bishita e Unit Delitonan Moral. Van Donselaar-Metry ta splika ku a invitá Aliansa, pa motibu ku e organisashon a hasi un petishon pa investigashon na maneho i proseso di trabou pa delitonan kontra moral.