WILLEMSTAD.- Virtual Youth Support ta habri awe un ofisina den Riffort djis riba Sopranos. Pa e okashon aki direktora i inisiadó di e proyekto aki Miraila Bernadina-Theodora ta na Kòrsou. El a mustra e importansia di Virtual Youth Support i kuantu asistensia nan a duna kaba na hóbennan di Kòrsou ku ta biaha pa studia na Hulanda.

Miraila Bernadina-Theodora tin eksperensia amplio den enseñansa na Kòrsou i na Hulanda i e ta pone esaki awor den práktika dor di duna yudansa na nos hóbennan.

E reakshon for di aña pasá te awor tabata tremendo. Hopi hende a sera konosí ku nan i nan tin mas eksperensia. E promé studiantenan, mas òf ménos 50 ku nan a guia na Hulanda, a duna nan e eksperensia aun mas pa nan sa unda kosnan ta bai fout unda por prepará mihó i asina drecha e servisio pa ku e studiantenan pa evitá ku nan ta kai afó.

I p’esei nan a mira ku tin mester di mihó preparashon na Kòrsou i den ougùstùs último a habri e filial na Renaissance/Riffort i awe ta e apertura ofisial di e ofisina aki.

Meta di e ofisina ta pa nan ta mas serka di e hóbennan. Miraila Bernadina a bisa ku na Kòrsou no a kustumbrá ku e parti virtual pero ke wak e hende den persona, p’esei e ofisina aki. Nan ta yuda e hóbennan ku e preparashonnan nesesario. For di pidi finansiamentu di estudio na DUO, SSC, ta sòru yuda e studiante haña skol, prepará nan ku kursonan i buska tur informashon. Un studiante ta kere tin bia e ta bai un direkshon pero no ta tene kuenta ku e por topa ku limitashonnan i pa evitá ku e no ta haña sa di e limitashonnan aki despues pero si delantá.

Mindset

Virtual Youth Support tin un kurso awor aki di ‘Mindset’ masha interesante. Hopi bia e hoben ta bai Ulanda i ta bai dal su kurpa den tur e problemanan ku nos ta tende di dje. Esaki por suak e hoben i p’esei e kurso di Mindset ta pa e prepará pa ni maske kiko pasa, e sa ku ta un meta e tin i e tin di sigui pa e logra su meta.

Hulandes

E estorbo ku e hóbennan na Hulanda mas ta topa segun Miraila Bernadina-Theodora ta e hulandes. E hóben ta yega den klas for di prinsipio ta haña ku e dosente ta bai muchu lihé i nan no sa tur palabra na hulandes. Esei ta e loke ta stroba mas. E parti finansiero tambe ta un punto di estorbo pa e studiante. Ora e kere ku ta tantu sèn e ta haña, e ta mustra hopi pero na Hulanda ta mira kon karu e kosnan ta. Tur esakinan ta pone ku e studiante tin di paga bon tinu.

Reto nobo

Pa loke ta e COVID-19, Miraila a bisa ku e studiantenan na Hulanda ta konfrontando esei komo un reto nobo. Nunka sa kiko ta topa, kon e  situashon ta, kon e skol ta i awor ta bin aserka ku mester tene kuenta tambe ku  regla di distansia sosial. Tambe ta bira friu i e hóben a kustumbrá otro na Kòrsou. Ta hopi regla ku tin di paga tinu kuné i ta un reto grandi i difísil pa nos studiantenan na Hulanda. I p’esei nan di Virtual Youth Support ta keda den kontakto ku e studiantenan pa nan sa ku nan tei i masha importante ku por komuniká na papiamentu, den e studiante su idioma.

Miraila Bernadina- Theodora a bisa ku komo e hulandes ya ta un problema ta importante pa un hende por papia e studiante su idioma pa yud’é sali for di e retonan.

Pa loke ta e ofisina na Riffort, Miraila Bernadina a bisa ku ta bon pa traha sita i pa asina por bai e ofisina. Delantá por bisa presis kiko mester di informashon.

E hóben studiante ta haña yudansa di ariba te abou, sea pa nan haña un lugá di biba te pa nan kumpra un pasashi. E posibilidat ei segun Miraila Bernadina tambe nan tin kaminda e studiante por paga tiki tiki pa su pasashi pa ora e momentu di biaha yega, ya e tin e kla pagá. Hopi studiante no tin e posibilidat di pag’é mesora ora reservá e pasashi i p’esei nan di Virtual Youth Support ta brinda e posibilidat ei.

Teniendo na kuenta e situashon di COVID-19 tin hopi hóben no a bai studia den eksterior. Pero apesar di esaki tin un grupo ku tòg a bai i ku Miraila Bernadina a bisa ku nan a haña chèns di yuda i guianan.

Dia Virtual Youth Support a kuminsá Miraila Bernadina no a ferwaktu ku e reakshon lo tabata asina grandi. El a keda ku ta 5 hóben e lo a bai guia pero e grupo a bira grandi. E ta kontentu ku e reakshon tambe di mayornan ku por ta trankil na Kòrsou sabiendo ku tin un organisashon ku por guia e hóbennan.

Por tuma kontakto ku Virtual Youth Support na info@virtualyouthsupport.nl, tambe riba FB Virtual Youth Support, telefòn ta 005999 843-8063