WILLEMSTAD.- E resultado di elekshon di djabièrnè último pa parlamento di Kòrsou a shòk partido Vishon, asina lider di e partido sr. Miles Mercera a duna di konosé na EXTRA.
Partido Vishon a logra saka 3541 voto den elekshon di djabièrnè último.
Sr. Mercera a bisa ku e resultado tabata un shòk pa nan i e tabata un sla duru ku no a logra yega e kantidat di voto pa 1 asiento.
“Nos a traha duru pa inspirá un direkshon i liderazgo diferente. Kisas den komienso hopi no a komprondé i nos a traha duru”.
Komo Vishon a wak e resultado den grupo chikí, pero ainda tin di analisá esaki internamente. E análisis lo tuma lugá awe. Mester tin gratitut pa kada un kandidato ku a postulá nan mes i a kore riesgo di drenta e arena polítiko. P’esei Vishon ta gradesido, i e grupo lo keda aktivo.
Vishon lo ke duna su kontribushon na e gobièrnu nobo ku forma. Sr. Mercera a bisa ku Vishon a skirbi un plan ku ke duna e gobièrnu nobo p’asina yuda nan den e áreanan di atenshon ku Vishon ta mira. Tambe nan ta dispuesto pa yuda e gobièrnu nobo ku nan ekspertisio.
Vishon komo tim i partido lo sigui. Den e kuater aña nan lo duna kontenido kon ta sigui i e ròl dje tim di Vishon. Lo laga tur hende tuma tempu pa evaluá nan mes i nan ròl i kon ta sigui pa futuro. Vishon lo sigui laga nan bos resoná den komunidat. Pues komunidat lo sigui tende di nan.
Serka partido Vishon tambe a yega e keho ku hopi hende a haña e papel di vota blanku ku pretu.
Awe Vishon tòg lo pidi klaridat serka Konseho Supremo Elektoral riba e papelnan di vota blanku ku pretu pa mas klaridat.
Pasobra niun hende a para ketu ora ku nan a haña e papel pretu ku blanku. Lo evaluá esaki tambe awe den nan reunion, pasobra mester tin klaridat riba e papel di vota.