THE BOTTOM.- Un volkan ku a bira aktivo atrobe i ku ta sakando algu di lava riba e isla di St. Vincent tin e komunidat di Saba un tiki preokupá, no opstante ku St. Vincent ta un tiki leu. T’asina ku habitantenan di Saba i tambe otro islanan den Karibe ta vigilando e desaroyonan na St. Vincent hopi djaserka, for di momentu ku e volkan La Soufrière ku ta riba e isla aki a mustra señalnan di ta aktivo atrobe.

Pero di otro banda, Gezaghebber Jonathan Johnson a trankilisá e habitantenan dje isla di Saba siman pasá den un mensahe spesial ku el a emití riba e asuntu aki. T’asina ku a surgi hopi intrankilidat despues ku notisia i fotonan a kuminsá sirkulá riba medionan sosial di supuesto aktividat volkániko riba e isla. Asta a mustra kon algu dje vegetashon lo a ser afektá riba Mount Scenery pa motibu di gasnan térmiko ku a kuminsá Sali.

Segun e mandatario, tin informashon robes i tendensioso ku a ser publiká riba medionan sosial riba aktividatnan volkániko na Saba. Pero el a klarifiká esaki bisando ku ta trata di fotonan ku ta data di mart 2020.

Mas aleu tambe Johnson a indiká ku e organisashon di Saba Conservation Foundation ku sosten di KNMI di Hulanda a bishitá e área ku e vegetashon seku anteriormente pero ku nan no a topa ningun prueba di aktividat volkániko. El a bisa ku no tin ningun motibu pa preokupashon i ku e volkan lokal ta ser vigilá djaserka. Si tin algu ta sosodé lo informá poblashon di esaki sigur.