WILLEMSTAD. - Un situashon un poko fèrfelu ku e hòmber D.S. di 42 aña di edat ta aden na e momentunan aki, pa motibu ku miéntras e ta den kuido intensivo despues di a pèrdè un pia den e tiroteo ku a tuma lugá den Saliña dia 25 di yanüari mardugá, banda di e echo ku e ta víktima, e ta sospechoso tambe den e kaso aki.

Dia 25 di yanüari tras di lomba tabatin un tiroteo sangriento den Saliña ora ku tres persona di un manera òf otro a risibí herida di bala, miéntras un di nan a resultá fatal.

Den e mardugá di dia 25 di yanüari, ora ku polis a yega den e área, a topa ku un hòmber ku herida di bala serio na su pia, esaki despues a resultá di ta e víktima (te na e momentu ei) D.S. i a keda transportá ku urgensia ku ambulans pa poli, miéntras a topa ku un kurpa ya sin bida un poko mas leu den e área di Saliña i finalmente un otro ta yega poli ku bala den lomba. Esun ku bala den lomba di inisial C.B. di 27 aña di edat a keda arestá despues di tratamentu na Sehos mes i D.S. a keda señalá komo sospechoso despues, ounke ku su situashon ta kritiko na e momentunan aki.

Polis investigando e kaso konfuso aki, ta parse ta hañando un bista kiko lo a pasa e dia en kuestion i probablemente kiko ta e motibu tambe.

Esaki a pone ku dia 31 di yanüari tras di lomba tabatin un “voorgeleiding” ku a tuma lugá na Sehos, kaminda ku hues komisario i reshèrshenan di ofisina táktiko di domisilio tabata presente, pa a skucha D.S.. E último aki ta duna un indikashon ku probablemente D.S. tambe ta den aresto preventivo.

Informashon ku EXTRA ta disponé di dje ta indiká, ku e entrada hudisial ku a tuma lugá dia 25 yanüari tras di lomba ta na un di e propiedatnan di D.S.

EXTRA tin informashonnan verídiko di e investigashon andando, pero ku na e momentunan aki no ta responsabel pa publikashon, pa no stroba e investigashon andando.

E echo ku e víktima D.S. ketu bai ta den kuido intensivo, tambe ta un faktor ku no ta apto na e momentunan aki pa mas informashon.

Esaki ta trese kuné ku na e momentunan aki tin tres detenshon den e kaso di tiroteo sangriento ku a tuma lugá na Saliña dia 25 di yanüari tras di lomba.

Esta D.S. i C.B. i L.D.d.L.S.B.G. nasé na Venezuela di 19 aña di edat.