WILLEMSTAD.- Lider polítiko di Partido KEM, Michelangelo "Lo" Martines ta eksigí un reakshon di Konseho Supremo Elektoral (KSE) riba e echo ku a pasa un siman di Pre-Elekshon pero KSE te ainda no a duna ningun splikashon ni pidi diskulpa riba e echo ku e papel i pòtlot di preelekshon no tabata adekuá.

Riba djasabra 30 di yanüari, den e promé mei ora ku urnanan a habri, Partido KEM a hasi denunsia na representantenan di KSE na e diferente urnanan ku e pòtlot kòrá ku nan a fasilitá pa vota kuné no tabata marka fásil i esaki tabata trese komplikashon kuné pa e votadónan.

Despues di preelekshon a resultá ku tabatin 626 voto inbálido ku ta konta pa un 3% di e total votonan (19224), kaminda na último elekshon 2017 solamente 1138 voto tabata inbálido (1%) di 78830. Ta mas kla ku di dia ku tin algu ku a bai hopi robes pa e votonan inbálido ta asina for di proporshon. P’esei Michelangelo Martines ta eksigí Konseho Supremo Elektoral pa tuma e situashon aki na serio i bin duna un splikashon pa pueblo kon bin tabatin asina tantu voto inbálido i tambe sigurá ku e situashon aki no lo bai ripití na próksimo elekshon dia 19 di mart 2021.

Tin un gran parti di pueblo ku no a risibí sufisiente informashon riba kon nan mester vota anto un pòtlot i papel no adekuá ta pone ku fásilmente fayonan por keda kometé i votonan ta keda inbálido. E resultado ta ku no solamente hopi voto ta bai pèrdí afektando nos sistema demokrátiko pero tambe e ta perhudiká partidonan nobo tambe. Pasó por ehèmpel partidonan manera Partido Mavis i Partido KAS no a yega e mínimo pa 30 o 40 voto, ken ta bisa ku nan lo no a yega si no tabatin asina tantu voto inbálido? Rèkòrt a keda kibrá na preelekshon pasó pueblo ke mira partidonan nobo p’esei mester salvaguardá e derechi sagrado di kada votadó.

Ta responsabilidat di KSE pa informá e pueblo mihó i tambe pone material adekuá pa e kantidat di votonan inbálido ta limitá.

Na un manera e por sinti manera e kos ta algu premeditá pa afektá e grupo ménos informá i ku no tin eksperensia di voto. Pa evitá e tipo di ponensianan aki Partido KEM ta spera un reakshon ofisial i públiko di KSE den e próksimo dianan.