WILLEMSTAD.-E direktiva di skol protestant VPCO ta kere ku ta hopi bon ku Ministerio di Enseñansa, Siensia, Deporte i Kultura a asumí su responsabilidat i dal e siguiente paso pa loke ta trata kubri gastunan asina nesesario pa trese solushon pa teknologia i inovashon (ICT). VPCO ta spera ku hinter sektor di Enseñansa lo por risibi tur e provishonnan digital nesesario, manera un datacenter.

E direktiva di skol ta indiká ku nan a tuma nota ku minister di Enseñansa a firma un akuerdo ku e kompania Blue Nap. Ta asina ku algun aña pasá direktivanan di skol a bati bèl relashoná ku digitalisashon den Enseñansa. Un di e nesesidatnan ta di por dispone di un datacenter. Un sentro di data ta brinda hopi benefisio ora ta trata kompra, mantenshon i maneho di server i otronan. VPCO ta indiká ku nan ta masha gradesido na e kompania Sincere ICT pa e bon trabou ku nan a realisá.

Maghalie van der Bunt-George direktor di VPCO ta splika ku e tim ku ta trèk e proseso di digitalisashon na e ministerio di Enseñansa, bou di liderazgo di Samara Freitas-Saab ta logrando bon adelanto. Esaki a resultá den akuerdo i kontraktnan manera esun ku minister Croes a firma resientemente ku Blue Nap. VPCO ta konta i konfia ku lo hasi esfuerso pa kumpli ku e nesesidatnan den Enseñansa konforme kondishonnan ku ta konta den Enseñansa.

E direktor di VPCO ta pidi pa tur esnan konserní keda fiha nan atenshon pa logra e provishonnan digital ku tur dosente i studiante ta wardando riba dje pa asina largu kaba. Den e grupo di trabou di digitalisashon tin ámtenarnan i representantenan di direktivanan di skol i tur ta traha pa logra mesun ophetivo.