WILLEMSTAD.- Ayera tribunal di korte di apelashon a bai di akuerdo ku e demanda di abogado general di 18 luna pa Nathaniel Monte (21) despues ku den korte di promé instansia el a keda apsolvé pa poseshon di arma.
Ministerio Públiko a apelá e sentensia pa motibu ku nan no tabata di akuerdo ku e desishon.
Den korte di apelashon, Monte a keda apsolvé di tur kulpa pa falta di informashon den prosèsverbal di polis, den luna di Sèptèmber na aña 2020.
Segun Ministerio Públiko dia 1e di yüni 2020, polisnan a haña un “melding” pa bai den área di Parera, kaminda algun hóben tabata pará den grupo.
Ora ku e agentenan a yega i mira e grupo di hòmbernan pará, nan a ordená tur hende hisa man i pone na e muraya di Casa Cuna .
Segun e verbalisante, nan a mira e akusado hisa su man, saka un arma koló maron i his’é benta tras di e muraya di Casa Cuna i kore bai. A start un persekushon i a logra detené e akusado Monte.
Ora ku polis a bai wak, nan a haña e arma bentá abou tras di e muraya. Monte a ninga redondamente ku e arma ta di dje.
El a splika ku riba e dia ei, el a bai kumpra mariwana serka un tal Gino. Ora el a yega, dos outo polis a kore presentá, un di “verboden” i e otro di via normal.
Ora Gino a mira e outonan di polis, el a zuai su arma i kore bai.
Segun Monte, e tambe a spanta tira e saku mariwana afó i kore bai, pa motibu ku el a kaba di sali fo’i prizòn un luna promé.
Ora el a sali kore, polis a pas’e pia pone ku el a kita kai.
Despues ku hues a pidi klarifikashon kon bin e agentenan a bisa ku e arma ta di Monte, e verbalisantenan a bolbe manda un prosèsverbal mas detayá, pa splika loke nan a opservá e dia ei.
Nan a splika ku nan a wak e hòmber saka un arma kolo skur, tira dor di e muraya di Casa Cuna. Monte a bisa ku Gino tabatin un polo kòrá i ta e, a tira e arma.
Esun ku a tira e arma, a sali na kareda. Polis a kore su tras i a logra detené. Ora ku a bai wak e arma a hañ’é tras di muraya, pero e arma no tabata funshoná.
Segun e agentenan tabatin niun hende ku tishùrt kòrá ku a tira e arma.
Durante kaso di korte apelashon Monte no a presentá paso e ta den eksterior.
Abogado general a haña e akusashon probá i a bisa ku ta 2 agente huramentá a firma e prosèsverbal, indikando ku ta Monte ta esun ku a tira e arma tras di muraya.
Durante tratamentu di e kaso, abogado Dickens a bisa entre otro ku por proba niun kaminda ku ta su kliente a tira e arma i ku tin 5 testigu ku a deklará k ta otro hende a tira e arma tras di muraya.
Segun e abogado 5 testigu a deklará ku ta un gai kamisa kòrá a tira e arma tras di muraya i ta papia di niun otro hende mas ku tambe a kore bai.
Segun e veredikto di ayera, tribunal di Hof a bisa ku den e di dos prosèsverbal ku polis a manda, nan a splika mas detayá kon tur kos a bai i asina por a proba ku ta Monte ta esun ku a tira e arma. Mirando tur esaki e tribunal di korte di apelashon ta haña e akusashon probá i ta bari e sentensia di “vrijspraak” den korte di promé instansia pa 18 luna di prizòn.