Maal: Minister Leito ta iresponsabel i negligente

WILLEMSTAD – Pa vários aña, e Faro ( Vuurtoren) na Oostpunt no ta funshonando. Gobièrnu di Kòrsou, ta doño i responsabel pa su mantenshon i operashon. Oostpunt ta un punta sumamente importante i peligroso kaminda nabegashon komersial, deportivo i peskero ta dependé di esaki tambe. Den pasado tabatin numeroso kaso di nóufrago i hogamentu akinan. Den skuridat, hasta aviashon ta hasi uso di e luz aki pa orientashon di horizonte i posishon huntu ku instrumento.  Ousensia di e luz aki ta forma peliger pa nabegashon, ta un estorbo den kasonan di “Search & Rescue” i ta peligrá seriamente bida di hende. Esaki resien a keda proba atrobe!

Willy Maal a mustra outoridatnan ku ta hopi reklamo ta drenta serka dje, komo si fuera e ta responsabel pa mantené e toren den funshon. Esaki no ta asina, Maal ta splika. “Ta Gobièrnu ta esun responsabel i no Maal. Maal solamente ta permití e toren riba su tereno, a kambio di hür i a base di palabrashon di ántes.  Un hür ku pa kolmo Gobièrnu tin vários aña i asta dékada, sin kumpli kuné, no opstante diferente atvertensia.” Den edishon di EXTRA di djabièrnè lo tin un relato kompleto di historia di e problema aki for di 2018 te awor i korespondensia ku Minister Leito.