WILLEMSTAD.- Djaluna anochi 3 di desèmber, pa mas o ménos 11’or, e boto Frisc interceptor di e barku di marina ulandes Zr. Ms Zeeland a keda dirigí den direkshon ost di Kòrsou, despues ku a señalá un moveshon straño riba laman na ost di Kòrsou. E boto tabatin un tim di speshal di warda kosta na bordo. E momentu ku Frisc interceptor a yega mas serka e personal na bordo a ripara ku ta un yola tabata den awa ku no ménos ku 37 persona indokumentá, inkluso un menor di edat, na bordo.

Frisc a haña asistensia di un boto ‘metal shark’ tambe di wardakosta pa asina yuda hiba tur e personanan indokumentá pa e base di wardakosta na Parera. Mas o ménos 03:50, esta den mardugá di djamars 4 di desèmber a keda kla ku tur e formalidatnan na wardakosta i di eseinan a entrega tur e personanan na fiskal ouksiliar di hustisia ku ta bai sigui atendé ku e kaso.