WILLEMSTAD.- Ayera atardi lat, kuminsamentu di anochi un piskadó na Banda Bou, despues ku el a keda pega den su boto riba e laman brutu di sùitwèst, sin por a yega kantu.

Ayera tardi den kareda di mitar di 4 wes a bira suku, laman a bira brutu i áwaseru duru a kai. Tabatin diferente piskadó riba laman; algun a logra yega kantu na tempu pero algun no.

Na Banda Bou Playa Piskadó tabatin sigur dos boto di piskadó riba laman ku no por a yega kantu. Dado momentu dor piskadó basta hoben a bula na awa i nan a logra lucha kontra di e olanan i a yega kantu. Pero tabatin dos otro piskadó den boto di kual un di nan segun e piskadónan na kantu tabata bisa EXTRA, un di nan no por landa. Tur dos tabatin nan salbabida bisti.

Lamentablemente un di nan a fayesé.

EXTRA su reportero tambe tabata na e sitio i riba petishon di e piskadónan na e sitio a yama tantu Citro komo warda Kosta. Pero a dura basta ratu, ora i mei sigur promé u warda kosta a yega i ya e hende a fayesé.

Riba EXTRA su Facebook tabatin diferente reakshon entre otro di personanan ku a bisa ku nan tambe a yama wardakosta i dikon a tarda asina tantu.

EXTRA a papai ku bosero di wardakosta sra Shalick Clement i na promé lugá el a lamentá loke a pasa i ku un persona a pèrdè su bida. Pero di otro banda el a splika EXTRA ku asina e melding a drenta na e sentral di warda kosta nan a Sali mesora. Pero tin di tene kuenta ku laman tabata brutu, olanan tabata kontrali konsekuentemente e boto tabata bayendo kontra di ola.

Mas aleu segun sra Clement, na mes momentu ku nan a Sali a drenta otro melding di un boto pèrdí. Nan a saka e Dash (avion) tambe i miéntras nan tabata bayendo kabes pabou nan tabata tira bista pa e boto pèrdí. Meskos ku laman tabata brutu pa e piskadónan, e tabata brutu pa e boto di warda kosta tambe. No ta asina segun sra Clement ku nan no a Sali mesora òf a neglishá e asistensia ei, pero tabatin sirkunstansianan rondó ku a pone ku nan no a yega mes lihé ku nan tabata ke i tampoko ku nan lo a yega si laman no tabata brutu.

Sra Clement a splika EXTRA ku nan tabatin kontakto ku un polis na Banda Bou, na e playa Piskadó ku nan tabata instruí pa bisa e piskadó pa no bula den laman. Si el a keda den boto nan lo por a skapa nan mas fásil ku den laman. Esaki pasobra mirando e laman sùitwèst, esaki ta zuig e persona bai kuné i ta masha difísil, asta ku ‘life vest’ bisti pa e skapa.

Un biaha mas sra Clement ta lamentá e situashon i ku nan no por a yega mas lihé, manera nan lo a deseá.