WILLEMSTAD. - Den mardugá djasabra 15 di sèptèmber e avion Dash di Warda Kosta a señalá un boto sin lus riba laman na altura di Awa Blanku ku tabata moviendo direkshon Fuik. A tuma nota ku tabatin dos persona abordo. E avion a notifiká Sentral di Reskate i Kordinashon ku a saka e boto Metal Shark I-03. Warda Kosta a interseptá e boto ku tabata pegá riba baranka i ora ku e personal di Warda Kosta a baha pa investigá e boto a topa ku 11 bulto di droga. E dos personanan no tabata den boto, pero despues ku yudansa di e avion Dash a logra arestá e dos persona. A hiba e dos personanan Warda di Polis Rio Canario i a entrega e 11 bulto nan di droga ku a pisa un total di 340 kilo. Detaye lo kontinuá den EXTRA djaluna mainta.