Yaluzi a hunga un ròl

WILLEMSTAD.- E wardadó di prezu S.J.F (35) ku djasabra último a keda detené pa maltrato severo di su pareha, su detenshon ayera a keda prolongá ku 8 dia mas.

Su abogado mr Lacle –Jansen a hasi petishon na hues komisario pa suspendé su detenshon bou di algun kondishon, pero hues komisario a ninga redondamente, mustrando gravedat di e echo.

Segun e informashon polisial un hòmber ku a bati su pareha i despues bah’é na warda di polis a keda detené riba e dia en kuestion.

Detenshon di e sospechoso a tuma lugá alrededor di dies pasá di diesun di anochi na warda di polis Rio Canario, despues ku den oranan mas trempan el a trese e dama na warda mal batí.

E dama a haña basta sla na entre otro kara, stoma barika, repchinan frakturá, órganonan vital ku a keda leshoná i vários parti mas di su kurpa. Aparentemente e hòmber a yega kas i haña e dama ta papia ku otro na telefòn. Esaki no a kai den bon tera serka e akusado i a kuminsá un diskushon ku a kaba na agreshon. E dama aparentemente a kore drenta baño pero e hòmber lo a kibra e porta i sigui agredí e dama.

Ku ambulans a transportá e dama den un situashon kritiko pa sala di emergensia di C.M.C.

E wardadó di prezu mes no ta bisando nada di e suseso. Despues di 8 dia e tin ku bolbe presentá dilanti hues komisario pa wak si su detenshon lo keda prolongá òf e ta bai den libertat.