WILLEMSTAD.- Djaweps último e Sentro di Reskate i Kordinashon di Wardakosta a detektá un boto sospechoso riba radar. RCC a informá e cutter Jaguar di Wardakosta pa e bai na e lokalidat. E tripulashon di Jaguar a informá ku e boto ku e nòmber “El Poder de Dios”, tabata na kaminda pa Kòrsou ku merkansia na bordo. Duana tambe a ser notifiká i Jaguar a kompania e boto pa drenta haf pa bai Duana. Durante kòntròl di Duana riba e boto a haña e kapitan ku dokumentunan di despacho di Colombia falsu.

Wardakosta ta informá ku tin kòntròlnan riba tur boto di Venezuela i Colombia ku ta drenta òf sali haf pa kumpra òf bende merkansia. E trabounan di chekeo ta ser ehekutá den kolaborashon ku Koninklijke Marechaussee, Duana i ‘port authorities’ di Aruba, Kòrsou i Boneiru. Tur boto mester tin nan dokumentunan vigente i original huntu ku nan. Wardakosta ta atvertí ku si personanan no mantené nan mes na regla nan por ser detené.