WILLEMSTAD - Ayera e helikòpter di Wardakosta a sali pa asistí dos turista ku tabata heridá riba Kristòfel. E dos hende hòmbernan ku tabata kana ku grupo diferente a subi despues di bastante awaseru di último dianan. Durante nan kaminata un di nan a heridá su mes na su rudia i e otro a kibra su ènkel despues di un kaida. Bomberonan huntu ku e ‘parkranger’ di parke Kristòfel a bai ariba pa yuda e personanan ku ‘brandcard’ mas lihé posibel. Na yegada serka e personanan heridá e konklushon tabata pa mihó pidi Wardakosta asistensia mirando nan situashon i e wer.

E dos personanan heridá a ser yuda individualmente pa e helikòpter di Wardakosta. A hiba esun hòmber promé i despues a regresá parke Kristòfel pa asistí e siguiente persona ku tambe mester a ser traspasá pa hospital. Na yegada di e helikòpter di Wardakosta na Hato un ambulans tabata warda pa hiba e personanan CMC pa nan por haña asistensia médiko. Wardakosta i Brantwer Kòrsou ta deseá e dos turistanan pronto rekuperashon.