WILLEMSTAD.- Wardakosta a tuma nota di un boto den oranan di mardugá i detené dos hòmber ku tabata na bordo. A konfiská algun bulto ku posiblemente ta droga, esei bosero di wardakosta Shalick Clement ta informá.

E avion di wardakosta tabata realisando un patruyahe den anochi na momentu ku a señalá un boto sospechoso riba laman. Den kordinashon ku Rescue Coordination Center a saka un boto di warda kosta ‘metal shark’ pa bai investigá e kaso mas profundo. Mas o ménos 04:05 e ‘metal shark’ a logra interseptá e boto ku dos hende na bordo, pero nèt prome ku yega serka di e boto e persona di wardakosta por a nota ku for di e boto a kuminsá benta bulto den awa.  Despues di detenshon a kue e bultonan i den e boto a topa ku mas bulto tambe. A entrega e personanan detené i e bultonan na Kuerpo Polisial di Kòrsou pa mas investigashon. Mas detaye den próksimo edishon di EXTRA.