WILLEMSTAD.- Wardakosta a logra interseptá un boto ‘go-fast’ ku sinku tripulante na bordo. E sentro di reskate i kordinashon (Rescue & Coordination Center) di wardakosta a nota ku djadumingu atardi 18:00 tabatin un ‘go-fast’ yegando Kòrsou. Mesora a saka un boto ‘Metal Shark’ di wardakosta pa bai investigá e kaso. E ‘go-fast’ tabata na un distansia d di mas o ménos 30km pafó di kosta. Na e momentu ku e hendenan den e ‘go-fast’ a nota ku wardakosta tabata yegando serka nan a hisa velosidat tratando na hui, tambe por a nota kon nan a kuminsá bena bultonan for di e boto. E personal di wardakosta a los algun tiru di atvertensia komo indikashon ku e boto mester para, pero na momentu ku nan no a duna oido na esaki wardakosta a los tirunan dirigí i asina a pone ku e ‘go-fast’ no por a move mas. Metal Shark a piki tur e bultonan ku e hendenan a benta na awa durante di e persiguishon riba laman. A detené e sinku tripulantenan di e ‘go-fast’.

Tantu e sinku tripulantenan komo e bultonan, ku probablemente ta droga, a keda entrega na e base di wardakosta na Parera. Mas despues a pasa e bultonan i e tripulantenan detené pa Kuerpo Polisial di Kòrsou. Un bia mas wardakosta a realisá tremendo labor. Mas detaye den edishon di EXTRA.