WILLEMSTAD - Ayera 7or di anochi e ‘Rescue and Coordinagtion center’ di wardakosta a risibí notifikashon di Kuerpo Polisial ku un boto di piskadó lokal “Despensami” ta konfrontando problema den área di St. Joris Baai. RCC a tuma kontakto mesora ku e boto pa wak kiko ta pasando. E piskadónan a mèldu ku laman ta hopi brutu i ku nan tin problema ku nan motor di boto. Mesora a indiká ku nan tabata drif den direkshon di kosta i ku na un momentu òf otro nan lo por dal den barankanan. Mesora e Wardakosta na Parera a keda pone na altura di e situashon. Nan a manda un patruya i helikòpter “Pantera” mesora pa e sitio pa atendé e situashon. Citro tambe a yega pa yudansa. E avioneta di wardakosta “Dash” i e helikòpter a kuminsá buska e boto. Despues di un ratu e avioneta “dash” a spòt e restunan di e boto i dos persona ku salbabida bisti ta drif den laman. Mesora e helikòpter a kuminsá ku e proseso pa saka e dos piskadónan fo’i laman i trese nan na Hato. Tur dos persona tabata den bon kondishon i niun no tabatin mester di yudansa médiko.