WILLEMSTAD - Ku e Plan di Término Largu 2019-2028 e empeño di Wardakosta Área karibense pa e añanan binidero ta finansieramente garantisá. Wardakosta Área Karibense te ku 2028 ta disponé di un total di € 168 mion, intenshoná pa remplaso di material. E kuater paisnan den Reino huntu ta pèrkurá pa e kobertura finansiero di e presupuesto. Esei ta pará den e Akuerdonan Intergubernamental, ku huntu ku e Plan di Término Largu (LTP, Lange Termijn Plan) 2019-2028 di Wardakosta Carib awe a trata den Konseho di Minister di Reino. Minister Ank Bijleveld-Schouten (Defensa) awe a ofresé parlamento hulandes e dokumentonan.

Wardakosta Carib ta eksistí for di 1996. Ta un koperashon entre tur pais den Reino. Hulanda (69%), Aruba (11%), Kòrsou (16%) i Sint Maarten (4%) proporshonalmente ta kontribuí na e gastunan. E kontribushon di Hulanda ta sali for di e presupuesto di Defensa

Libramente por yama e koperashon eksitoso. Wardakosta Carib komo mantenshon di derecho marítimo ta demonstrá ku e ta un konekshon indispensabel den e kadena di seguridat den e parti karibense di Reino.

Wardakosta no ta dirigí solamente riba vigilansia di e fronteranan marítimo eksterior. E organisashon ta hunga un papel importante tambe den kombatimentu di kriminalidat ku ta pasa frontera i nan tin tarea riba tereno di vigilansia, ‘search and rescue’ i kombatimentu di desaster.

Pa por ehekutá e tareanan aki bon e añanan binidero tambe, periódikamente mester remplasá material. Ku LTP Defensa ta duna komprenshon di esaki. Di e 168 mion, 159,9 mion ta bai pa invershon ku bista riba remplaso di material. E suma sobrá ta intenshoná pa gastu di eksplotashon.

Defensa, komo atministradó di Wardakosta Carib, ta haña esensial ku ta sigui garantisá e empeño operashonal di Wardakosta Carib. Sigur den e temporada aktual, kaminda kriminalidat di droga ta oumentá ekstremamente. Banda di esaki e region tin keber ku un Venezuela instabil, trafikashon di hende i problemátika di migrashon.