WILLEMSTAD - Últimamente Wardakosta a nota drone bulando den bisindario di su unidatnan riba laman i aerio durante di operashonnan. Un kaso ku a tuma lugá resientemente ta kaminda Wardakosta su helikòpter a bai hasi un operashon di búskeda i reskate riba laman banda di Tera Kòrá/San Pedro di un hende hòmber. E helikòpter a bai pa buska i reskatá e persona i hañ’é konfrontá ku un drone ta bula den e mesun área.

Drone ku ta bula den área di unidatnan di Wardakosta ta forma un gran peliger pa motibu ku no tin kontakto entre e helikòpter i esun ku ta bula ku su drone. E pilot di e helikòpter no ta na altura di kua moveshon i ruta e drone lo bula, lokual por terminá den un aksidente. Un piloto di e helikòpter ku ser desviá ta pèrdè su focus for di e operashon ku e mester ehersé na momento ku e tin ku tene kuenta ku un drone.

Riba e wèpsait di Curaçao Civil Aviation Authority (CCAA) por haña regla i regulashon tokante uzo di drones na Kòrsou. Un di e reglanan riba e wèpsait di CCAA ta bisa ku esun ku ta manehá e drone ta responsabel pa dañonan kousa ku e drone. Tur doño di un ‘remote piloted aircraft operation’ mester ta na altura di regla i regulashon di CCAA i mester mantené nan mes na esaki.

Wardakosta ta hasi un apelashon urgente na doño i/òf esun ku ta manehá un drone pa no bula esaki den bisindario di e unidatnan di Wardakosta i pa tene kuenta ku e regla i regulashon pa por manehá un drone.