WILLEMSTAD - Wardakosta konhuntamente ku Kuerpo Polisial di Kòrsou ku kontrol severo riba laman i na nos kostanan. Meta di e kòntròlnan aki ta pa garantisá ku personanan ta mantené nan mes na e leinan vigente ku Gobièrnu di Kòrsou a stipulá pa evitá COVID-19 sigui plama riba nos isla.

Wardakosta ta informá doñonan di boto, seadoo i piskadónan ku e medidanan dekretá dor di Gobièrnu di Kòrsou ta bálido pa usuarionan di laman tambe. Pa e motibu aki no ta permití ningun tipo di aglomerashon ni konsentrashon di boto ku personanan riba dje riba laman, na pirnan ni tampoko riba flòtnan. Tampoko ta permití pa organisá, laga organisá òf tuma parti na aktividatnan, enkuentronan òf eventonan na kosta, riba laman manera Fuikdag òf na Klein Kòrsou durante di e periodo di krísis di COVID-19 aki.

Wardakosta, Kuerpo Polisial i demas outoridatnan kompetente i enkargá ku mantenshon di òrdu públiko, lo atendé debidamente i aktua di forma represivo kontra tur esnan ku no tene nan mes na reglanan i/o medidanan, ku e fin pa yuda kontené plamamentu di e vírùs di corona.

“Nos salú ta den nos nos mes man. Ban kuida nos mes i kuida otro!”