WILLEMSTAD - Den ora nan lat di djabièrnè anochi 30 di ougùstùs, Sentro Marítimo Operashonal di Wardakosta a risibí un mensahe di un boto tipo katamaran den nesesidat di asistensia.  Ta trata di un hende hòmber i un hende muhé di nashonalidat franses ku a keda pega riba kosta na altura di Hambrak. Promé ku a pega riba tera, e hende hòmber ta tin leshon na su kurpa kaba, i tabata den nesesidat di asistensia médiko.

Inmediatamente a alerta personal di Wardakosta ku a dirigí nan mes ku un Metal Shark i tambe a pidi asistensia di CITRO.  Personal di CITRO a logra di subi e katamaran pero dor di e kondishon brutu di laman, no a logra di transportá e dos persona nan i hiba nan e boto di CITRO.

Mirando e kondishon di e hende hòmber franses, a disidí di manda e helikòpter di Wardakosta pa buska tur hende ku tabata riba e katamaran. A logra di reskatá nan tur i hiba nan bèk tera. Personal di ambulans na HATO a hiba e mener CMC pa risibí tratamentu médiko.