WILLEMSTAD – Ayera atardi alrededor di 6:10 nèt na momentu ku solo a kuminsá baha a drenta un notifikashon serka Rescue & Coordination Center (RCC) di Wardakosta ku lo tin un operador di Seadoo en problema. Un testigu a yama pa mèldu ku e por a nota ku un persona ku tabata operá un Seadoo lo mester a kai for di esaki i no tabata logrando pa aliansa bek pa por subi e aparato. Esaki lo mester a tuma lugá 500 meter for di kosta na altura di Zanzibar. Pa koinsidensia nèt na e momentu nan ei tabatin un patruya di Wardakosta den Spaansewater i por a yega rápidamente na e sitio di e suseso. Na yegada Wardakosta por a nota ku e hòmber operador di e Seadoo ya a keda saka for di laman ku yudansa di un persona riba un otro Seadoo. Wardakosta e ora ei a logra hiba e Seadoo sin okupante na playa di Palapa. E okupante a indiká ku e tabata den bon estado pero e komandante di Metal Shark a yama ambulans tòg komokiera ku e persona a guli hopi awa di laman. E hòmber di 32 aña di edat pa tur seguridat a keda transportá pa hospital komo ku a konstatá ku e tabatin poko oksígeno den su sanger.