WILLEMSTAD - Durante di un patruya di e avion Dash di Wardakosta e tripulashon a detektá un boto ta drif riba laman. Na momento ku a bai investigá a lanta sospecho ku tin un persona sin bida den e boto ku tabata drif. Abase di e informashon ku e tripulashon di e avion Dash a manda pa e Sentro di Reskate i Coordinacion di Wardacosta a dirigí e cutter Panter di e punto di sosten na Aruba pa bai na e lokalidat di e boto.

Lokual a hasi e búskeda di e boto un reto ta e echo ku e kondishon di laman i tèmpo tabata basta malu. E laman tabata brutu ku hopi bientu i olanan haltu. E Sentro di Reskate i Koordinashon a bolbe dirigí e avion di patruya pa asistí e cutter Panter den e búskeda di e boto.

Na yegada na e boto e tripulashon di Panter no a logra baha riba e boto pa motibu ku tempu tabata hopi malu. Tambe e tripulashon a detektá diferente kurpa sin bida kualnan tabata den estado avansá di deskomposishon.

E cutter Panter a hasi diferente intento pa por logra tou e boto, pero esaki no a logra debí ku e kabuya tabata kibra na kaminda. E laman brutu i e tempu malu a pone ku un dado momento e kabuya di tou a bolbe kibra i Panter a pèrdè e boto den e skur di anochi, despues di esaki no a logra detektá e boto mas. Wardakosta a saka un notifikashon pa barkunan riba laman tambe tin un ‘sharp lookout’ pa e boto kual ta drif riba laman. Wardakosta konhunto ku outoridatnan di Aruba i partnernan internashonal a kuminsá un investigashon den e kaso aki.