WILLEMSTAD - Ayera nochi alrededor di 23:55 e avion Dash 8 di Wardakosta tabata riba un patruya ora el a señalá un boto sin lus ku tabata move den direkshon di Klein Kòrsou. Mes ora e tripulashon di e Dash a notifiká e Sentro di Reskate (RCC) di Wardakosta. E Sentro di Reskate na su turno a pasa e informashon aki pa e barku di Marina Real, ku ta nabegá aworakí pa Wardakosta, i pa e barku Jaguar di Wardakosta. Tur dos barku tabata patruyá den awa di Kòrsou na mesun momentu. Tambe a notifiká e Punto di Sosten Kòrsou ku a lansa nan Metal Shark I-02 pa bai interseptá e boto.
A interseptá e boto alrededor di 02:45 ora na 7 mia sùit di Klein Kòrsou. Durante e persiguishon a los un tiru di atvertensia. A resultá di ta un boto tipo Eduardoño ku 4 persona a bordo i un prikichi. A trese e boto na e pir di Wardakosta i e kuater persona a keda entregá na polis. A yama servisio veterinario pa bin buska e prikichi.