WILLEMSTAD - Durante un patruya rutinario na bordo di un Metal Shark, e personal di Wardakosta a nota dos hòmber ku tabata sambuyá i saka kref i karkó for di laman. E hòmbernan tabatin un kantidat grandi di kref i karkó huntu ku nan, ku tabata demasiado chikitu. Pa lèi, e 'visserijlandsbesluit', ta prohibí pa saka karkó mas chikitu ku 18 centimeter i kref mas chikitu ku 25 centimeter for di laman pa konsumo. E motibu pa esaki ta ku e animalnan aki ta ser menasá ku ekstinshon. E karkó i e kref chikitu no ta haña chèns pa desaroyá bira adulto i komo tal no por reprodusí. E lei ta prohibí peska tambe riba kref ku ta kambiando su kaska òf kref ku ta den fase di reprodukshon.