WILLEMSTAD - Ayera atardi pa 17:48 e Sentro di Reskate (RCC) di Wardakosta a risibí un yamada di Sentral di Polis ku un persona ku a bai snòrkel na altura di Casa Abou no a regresá. E persona ku a bai snòrkel ta un hòmber hulandes di 41 aña. E tabata riba un baranka pero komokiera ku e koriente di laman tabata fuerte e no por a landa yega bek. Ora polis a yega Casa Abou nan a pidi asistensia di un Metal Shark di Wardakosta pa reskatá e persona. Mesora e Sentro di Reskate a alarmá un unidat ku a sali bai yuda. E Metal Shark a yega na e baranka i e personal di Wardakosta a logra baha e persona i poné riba nan boto i hib’é kantu serka su famia i polis. E hòmber no tabata tin mester di asistensia médiko.