WILLEMSTAD – Awe mainta alrededor di 10or Rescue & Coordination Center (RCC) di Wardakosta a risibí notifikashon for e katamaran ku ta hiba turista Klein Kòrsou ku tin un hòmber ta drif den laman i a logra subié na tera. Esnan presente na Klein Kòrsou a trata di reanimá e turista di 75 aña di edat ku lo a sufri un atake di kurason.  RCC mesora a tuma kontakto ku Citro pa por manda un dòkter pero no tabata nesesario ya ku tabatin un otro dòkter ya presente na e sitio. Helikòpter di Wardakosta tambe a yega na Klein Kòrsou i Metal Shark tambe a kue direkshon ei. Despues di a trata di reanimá e turista pa 20 minüt a bin konstatá su morto. E kurpa sin bida a keda transportá ku helikòpter pa Hato. Metal Shark a transportá e famianan pa Caracasbaai pa einan buska nan outo.